Fræðslustarf – á alþjóðlegum grundvelli og fjórðungsvísu
Skaftfelli er ætlað að verða burðarstoð í listgreinamenntun á Austurlandi. Frá árinu 2001 hefur Dieter Roth Akademían, ásamt Listaháskóla Íslands, staðið fyrir árlegri vinnustofu útskriftarnema og erlendra gestanemenda í Skaftfelli. Á þessum námskeiðum er allur bærinn opnaður fyrir nemendunum, þeir vinna náið með starfsmönnum hinna ýmsu verkstæða og fyrirtækja í bænum að sýningu sinni í Skaftfelli. Í burðarliðnum er að víkka út þetta starf og bjóða uppá viðlíka námskeið fyrir erlendar akademíur.
Skaftfell tekur einnig reglulega á móti hópum frá framhaldskólunum á svæðinu, í sýningarheimsóknir og listamannaspjall. Að auki hefur Skaftfell umsjón með myndmenntakennslu fyrir efri bekki Seyðisfjarðarskóla.
Fræðsluverkefni fyrir grunnskóla
Skaftfell hóf árið 2007 markvisst fræðslustarf sniðið að þörfum grunnskólanna á Austurlandi. Á hverjum vetri hefur Skaftfell boðið upp verkefni og miðlað til grunnskóla á Austurlandi, sem fjallar um myndlist með einum eða öðrum hætti, til að auðga listgreinakennslu allra skólanna í fjórðungnum.
2007-2008
Fyrsta fræðsluverkefnið Skaftfells, árið 2007, var unnið í samstarfi við Listasafn Íslands. Sett var upp sýningin Íslensk myndlist: hundrað ár í hnotskurn í aðalsýningarsal Skaftfells og um 300 nemendum úr fjórðungum boðið á stutt námskeið í tengslum við sýninguna. Markmiðið var að auka þekkingu nemendanna á þróun myndlistar og bæta myndlæsi þeirra, einkum og sér í lagi á samtímalist. Nánar um sýninguna.
2008-2009
Á skólaárinu 2008 – 2009 var Fræðakistillinn unninn í samstarfi við Tækniminjasafn Austurlands. Verkefnið gekk út að skoða sambandið milli lista og vísinda á örvandi hátt. Kistillinn fór í alla grunnskólanna á Austurlandi og fékk mjög góðar viðtökur. Nánar um Fræðakistilinn
2009-2010
Námskeiðið Hugmyndavinna og endurvinnsla í myndlist og sköpun var sett á laggirnar á skólaárinu 2009 – 2010. Markmið námskeiðsins að víkka sjóndeildarhring nemenda og auka á fagurfræðilegt læsi þeirra. Tveir leiðbeinendur fóru 13 skóla og alls tóku 130 nemendur þátt í námskeiðinu í 7.-10. bekk.
Eftirfarandi ljósmyndir eru frá Eskifirði, skólaárið 2009-2010, þegar unnið var að hugmyndavinnu og endurvinnslu efnis í myndlist og sköpun.
2010-2011
Á skólaárinu 2010 – 2011 var boðið upp á sýningarleiðsögn og verkefni um sýninguna Annan hvern dag, á öðrum stað. Sýning er lokaafrakstur af árlegu námskeiði sem hefur verið haldið í Skaftfelli frá 2001, á vegum Listaháskóla Íslands, Dieter Roth Akademíunnar og Tækniminjasafnsins. Nánar um sýninguna.
