Skaftfell – miðstöð myndlistar á Austurlandi rekur gestavinnustofur fyrir myndlistarmenn og fræðimenn í þrem húsum á Seyðisfirði.
Tekið er á móti umsóknum frá 1. júní ár hvert og umsóknarfrestur rennur út 1. september. Ekki er tekið á móti umsóknum á öðrum tímum.
Frekari upplýsingar um aðstöðu , dvalargjöld og skilmála má finna neðar á síðunni.
Gestavinnustofum Skaftfells er ætlað að stuðla að samfélagi listamanna, heimamanna og gesta. Að búa í haginn fyrir skapandi samræður milli listarinnar og hversdagsins. Að búa listamönnum rými til vaxtar og sköpunar í litlu samfélagi þar sem allt er hægt.
Eftirfarandi forsendur eru hafðar til grundvallar vali á listamönnum:
- Gæði verka metin af innsendum gögnum.
- Náms- og ferilskrá
- Staðfesting á fagmennsku, metin af innsendum gögnum
- Merki þess að dvöl í gestavinnustofu Skaftfells muni hafa gagnleg áhrif á þróun listamannsins.
Þó svo að gestavinnustofur Skaftfells séu fyrst og fremst fyrir myndlistarmenn þá eru teknar til greina umsóknir frá listamönnum sem vinna á milli miðla eða í aðra miðla en á forsendum myndlistar. Umsóknir frá hópum eru einnig vel séðar.
Tímamörk dvalar:
Hægt er að sækja um 1 til 6 mánuðir.
Dvöl hefst ávalt 1. hvers mánaðar, einungis er úthlutað heilum mánuðum.
Dvalargjöld:
Mánuðurinn 50.000
Staðfestingargjald sem samsvarar 1 mánuði greiðist um leið og gestavinnustofna er bókuð.
Gestavinnustofa Skaftfells
Á þriðju hæð Skaftfells er falleg og björt gestavinnustofa fyrir lista- og fræðimenn. Hún er 80 fermetrar og búin öllum helstu nauðsynjum. Gestavinnustofan skiptist í tvö svefnherbergi með sitthvoru hjónarúminu, baðherbergi með sturtu, og vinnurými. Í vinnurýminu er eldunaraðstaða, borðbúnaður, ísskápur, eldhúsborð og stólar, ljósaborð, borðplötur, búkkar o.fl. Einnig er þar tvíbreiður dívan sem nýtist jafnt sem sófi eða rúm.Í gestavinnustofunni er tölva (MAC), prentari og þráðlaust internet. Mögulegt er að fá afnot af skanna og síma.
Hóll - Gestavinnustofa Birgis Andréssonar
Gestavinnustofa Birgis Andréssonar er rekin í minningu hans. Birgir var einn af fremstu listamönnum sinnar kynnslóðar, list hans var tengd Íslandi og íslenskri menningu með afar sterkum hætti og arfleifð hans er mikilvæg spegilmynd þjóðar. Gestavinnustofan er fyrir myndlistarmenn og aðra lista- og fræðimenn.
Gestavinnustofan er til húsa á Hóli, húsi Birgis við Vesturveg á Seyðisfirði. Húsið er lágreist, einlyft einbýlishús. Það stendur við bakka Fjarðarár. Á jarðhæð hússins er stofa með góðu vinnurými sem snýr að ánni, lítið eldhús og baðherbergi með sturtu og þvottavél. Á efri hæð hússins eru tvö svefnherbergi með rúmstæðum fyrir 3. Í húsinu eru tveir aukabeddar. Borðbúnaður, sængur, rúmföt og handklæði fyrir 5 manns fylgja gestavinnustofunni.
Fossgata - Járnhúsið
Gestavinnustofan stendur við Fossgötu 4, gatan er botnlangi og upp af henni liggur stígur að Dagmálafossi. Húsið er yfir 100 ára gamalt járngrindarhús, það fyrsta sinnar tegundar á landinu. Það er í eigu listamann sem dveljast þar hlut úr ári og er allt gert upp að innan af þeim sjálfum. Húsið er 115 m2 á einni hæð. Þar eru tvö svefnherbergi, baðherbergi með sturtu og stórt aðalrými með góðri vinnuaðstöðu, sófahorni og eldhúsi. Borðbúnaður, sængur, rúmföt og handklæði fyrir 5 manns fylgja gestavinnustofunni.
