Um fræðslustarf Skaftfells
Skaftfell sinnir fræðslustarfi fyrir börn, ungmenni og fullorðna bæði á Seyðisfirði og fjórðungsvísu.
Lisfræðsluverkefni Skaftfells
Árið 2007 hafði Skaftfel frumkvæði að markvissu fræðslustarfi sérsniðnu að þörfum grunnskólanna á Austurlandi. Miðstöðin hefur síðan þá boðið upp á listfræðsluverkefni sem fjallar um myndlist og sköpun með einum eða öðrum hætti til að auðga listgreinakennslu í fjórðungnum. Ennfremur hefur miðstöðin unnið náið með Seyðisfjarðarskóla í fjölda ára og sá m.a. um myndmenntakennslu fyrir elstu nemendur skólans á tímabilinu 2009-2017.
Listfræðsluverkefni Skaftfells hafa síðustu ár verið hluti af BRAS – menningarhátíð barna og ungmenna á Austurlandi á haustin og í samstarfi við List fyrir Alla. Verkefnin eru hönnuð og kennd af starfandi listamönnum og eru boðin skólum á Austurlandi og Norðausturlandi að kostnaðarlausu. Venja er að annað hvert ár tengist verkefnið sýningu í Skaftfelli og er þá nemendum boðið í heimsókn á Seyðisfjörð þar sem þau vinna verkefni um sýninguna og fá leiðsögn. Hin árin ferðast verkefnin á milli skóla.
Samstarf við Listaháskóla Íslands
Dieter Roth Akademían: Á tímabilinu 2001-2018 stóð Dieter Roth Akademían, ásamt Listaháskóla Íslands, fyrir árlegu námskeiði fyrir útskriftarnemendur myndlistardeildar sem bar heitið Vinnustofan Seyðisfjörður. Á þessum námskeiðum var allur bærinn opnaður fyrir nemendunum og unnu þeir náið með starfsmönnum ýmissa verkstæða og fyrirtækja í bænum að verkum sínum sem þau enduðu með að sýna í Skaftfelli. Samstarfsaðilar voru m.a. Tækniminjasafn Austurlands og Stálstjörnur.
Prentvinnustofan: Árin 2019 – 2023 var stofnað til nýs samstarfsferkefni milli Skaftfells og Listaháskóla Íslands með sama fyrirkomulagi og Vinnustofan Seyðisfjörður en hins vegar með áherslu á prentmiðilinn. Nemendur frá LHÍ komu og dvöldu á Seyðisfirði í tvær vikur og nýttu sér prentaðstöðu sem í boði er í frðinum auk þess sem hópurinn setti upp færanlega prentaðstöðu í sýningarsal Skaftfells sem var jafnframt vinnuaðstaða þeirra. Dvöl þeirra lauk svo með sýningu í sýningarsalnum sem stendur í nokkrar vikur. Áhersla var lögð á að nemendur nýttu tímann til að öðlast dýpri skilning á prentferlinu og kynnast lykilhugmyndum við útfærslu prentverka undir handleiðslu starfandi myndlistarmanna og sérfræðinga í grafík. Leiðbeinendur Prentvinnustofunnar voru Sigurður Atli Sigurðsson, myndlistarmaður og kennari við LHÍ.
Vinnustofan Seyðisfjörður: frá 2024 hefur upprunalegt fyrirkomulag Dieter Roth Akademíunnar verið notað sem innblástur í nýja vinnustofu þriðja árs myndlistarnema frá LHÍ undir handleiðslu Gunnhildar Hauksdóttur sem sjálf tók þátt í fyrstu Vinnustofu Seyðisfjarðar með Dieter Roth Akademíunni í Skaftfelli árið 2001. Nemendur dvelja á Seyðisfirði í tvær vikur og vinna að uppsetningu sýningar. Þau heimsækja fólk og fyrirtæki í bænum og fá innblástur og aðstoð við gerð nýrra verka.
Leiðsagnir
Skaftfell býður skólum og öðrum hópum velkomin upp á leiðsagnir um sýningar í sýningarsal Skaftfells. Fræðslufulltrúi Skaftfells sér um leiðsagnir og hægt er að bóka þær gjaldfrjálst með því að hafa samband við fraedsla@skaftfell.is. Skaftfell á í nánu sambandi við Seyðisfjarðarskóla og koma nemendur reglulega í heimsókn á sýningar.
Prentnámskeið
Í samstarfi við Prentverk Seyðisfjörður stendur Skaftfell reglulega fyrir prensmiðjum fyrir börn og unglinga í hinum mismunandi aðferðum prenttækninnar. Skaftfell hefur einnig hafið samsarf við Menntaskólan á Egilsstöðum sem kemur nú á haustin í tengslum við BRAS og nýtir sér aðstöðuna sem hluti af listkennslu í skólanum.
Aðrar smiðjur og námskeið fyrir börn og fullorðna
Skaftfell býður upp á einstakar smiðjur fyrir bæði fullorðna og börn í tengslum við viðburði, gestavinnustofur eða sýningar.
Listamannaspjöll
Skaftfell stendur fyrir listamannaspjöllum þar sem gestalistamenn Skaftfells kynna fyrir almenningi það sem þau eru að vinna á meðan á dvöl þeirra stendur. Þessir viðburðir eru gjaldfrjálsir.
Viðburðir og námskeið eru auglýst á heimasíðu Skaftfells og á samfélagsmiðlum. Einnig mælum við með að skrá sig á póstlista Skaftfells til að fá mánaðarlegt fréttabréf með öllum viðburðum sem á dagskrá eru.