Sýningarstjóri: Gavin Morrison
4. Júlí – 27. september, 2026
Skaftfell Myndlistarmiðstöð
Seyðisfjörður, Ísland
Roman Signer (f. 1938) er svissneskur listamaður sem lýsir sjálfum sér sem Aktionskünstler, athafnalistamanni. Hann gerir kvikmyndir, myndbönd, ljósmyndir og innsetningar af sviðsettum atburðum: hlutum sem falla úr jafnvægi, hversdagslegum hlutum sem verða fyrir óvenjulegum athöfnum og andstæðum kröftum. Þessar athafnir beinast að endurteknu safni hluta: borðum, stólum, stígvélum, kajökum, regnhlífum. Allt er eðlilegt en við óvæntar aðstæður.
Signer er einn af mikilvægustu listamönnum samtímans og frá því snemma á tíunda áratugnum hefur hann heimsótt Ísland til að ferðast og vinna verk. Ísland er orðið meira en bakgrunnur fyrir myndbönd; það er nánast aðalpersóna í verkum hans. Þetta samband hefur getið af sér nokkur af hans mikilvægustu verkum, svo sem: Kajakferð um Snæfellsnes frá 2000, myndbandsinnsetning með illa förnum kajak. Myndbandið sýnir listamanninn í kajak sem er dreginn um malarvegi Snæfellsness. Verkið er absúrd, ljóðrænt og gleðilegt.
Þessi sýning er yfirlitssýning á verkum sem hann hefur unnið í ferðum sínum til Íslands. Margar þessara ferða hafa hafist á Seyðisfirði. Á sýningunni verða eldri súper-8 kvikmyndir, innsetningar, skúlptúrar og ljósmyndir. Hún gefur tækifæri til að íhuga hlutverk landslags í verkum hans og eðli sérstaks sambands hans við Ísland.
Í tengslum við sýninguna verður ný útgáfa bókarinnar when you travel in Iceland you see a lot of water gefin út. Bókin er samtal milli íslenska listamannsins Tuma Magnússonar og Signer á ferðalagi þeirra um Ísland.
Roman Signer býr og starfar í St. Gallen í Sviss. Hann stundaði nám við Schule für Gestaltung í Zürich árið 1966 og hélt síðan áfram í skúlptúrnám við Schule für Gestaltung í Luzern og þaðan í Listaháskólann í Varsjá í Póllandi. Hann á að baki langan sýningarferil. Meðal mikilvægra einkasýninga má nefna: Kunsthaus Zürich, 2025; Barbican Centre, London, 2015; China Academy of Arts, Hangzhou, 2014; Swiss Institute, New York, 2010; Palais de Tokyo, París, 2009. Hann var fulltrúi Sviss á Feneyjatvíæringnum árið 1999. Signer hefur tvisvar áður sýnt í Skaftfelli: Birgir Andrésson, Tumi Magnússon og Roman Signer, 2010, og RÓ RÓ, 2014.
