Út er komin bókin Skaftfell: tilurðarsaga 1996-2008 eftir fyrrum forstöðumaður Skaftfells, Tinnu Guðmundsdóttur. Skaftfell á Seyðisfirði var stofnað árið 1998 og er ein langlífasta sjálfstæða listamiðstöð landsins. Í útgáfunni er rýnt í sögu miðstöðvarinnar allt frá árinu 1995, þegar grasrótarstarfsemi fór að láta á sér kræla, fram til ársins 2008. Frá upphafi hefur þróttmikið sýningarhald með áherslu á samtímalist verið burðarás starfseminnar, en auk þess hefur Skaftfell starfrækt gestavinnustofu og veitingasölu.

Saga Skaftfells er margradda enda stóð fjölbreyttur hópur að baki stofnunarinnar. Uppbyggingarorkan var mikil og einkenndust fyrstu árin af sjálfboðaliðastarfi við að koma húsnæðinu í starfhæft form. Fjallað er um fyrstu sýningarnar, upphaf Skaftfells Bistró og mikilvægt samstarf við Listaháskóla Íslands og Dieter Roth Akademíuna.

Með þessari útgáfu er dregin upp mynd af því hvernig grasrótarhreyfing, listrænn metnaður og samstillt samfélag geta haldið uppi lifandi menningarstofnun á landsbyggðinni. Arfleifð og saga Skaftfells er vitnisburður um umbreytandi möguleika lista þar sem þrautseigja og sköpunargleði spila lykilhlutverk.

Í bókinni eru viðtöl við lykilaðila sem bæði komu að stofnun Skaftfell og tóku þátt í starfseminni: Aðalheiði Borgþórsdóttur, Arnbjörgu Sveinsdóttur, Björn Roth (1961-2026) Daníel Björnssyni, Grétu Garðarsdóttur, Ingu Jónsdóttur, Kristjáni Steingrími Jónssyni, Pétri Kristjánssyni, Rúnu Þorkelsdóttur og Jan Foss, Rúrí, Sirru Sigrúnu Sigurðardóttur, Sólveigu Öldu Halldórsdóttur og Þóru Guðmundsdóttur.

Rannsóknarvinna, úrvinnsla viðtala, textaskrif og ritstjórn var í höndum Tinnu Guðmundsdóttur með aðstoð Freyju Reynisdóttur. Tinna Guðmundsdóttir, Celia Harrison, Þórunn Eymundardóttir, Birna Geirfinnsdóttir sáu um myndaval og Studio Studio (Arnar Freyr Guðmundsson, Birna Geirfinnsdóttir) sáu bókarhönnun og umbrot.

Skaftfell gefur út bókina sem telur 304 bls.

Við bjóðum ykkur að taka þátt í fullri dagskrá með okkur laugardaginn 25.apríl í Skaftfelli, Austurvegi 42.

15:00 Skaftfell Bistró
Útgáfuhóf bókarinnar um Skaftfell: Tilurðarsaga 1996-2008
Upplestur og kynning frá Tinnu Guðmundsdóttur höfundi bókarinnar.

Tinna Guðmundsdóttir hefur unnið að verkefninu með hléum síðan 2017 og vill Skaftfell þakka henni fyrir frábært starf og þakka öllum þeim sem tóku þátt í gerð bókarinnar.

Skaftfell þakkar Miðstöð íslenskra bókmennta, Múlaþingi, Myndlistarsjóði, Miðstöð menningarfræða á Seyðisfirði – Austurbrú og Nýsköpunarsjóði námsmanna fyrir fjárhagslegan stuðning við verkefnið.