Bókin Dúett kom út fyrir tæpu ári og er samstarfsverkefni hjónanna Lóu, Ólafar Bjarkar Bragadóttur, og Sigurðar Ingólfssonar. Hún málar myndirnar og hann yrkir ljóðin. Myndirnar eru unnar með blandaðri tækni og málaðar á árunum 2007-2008. Sonnettusveigurinn var fimmtán ár í smíðum. Sýningin hefur verið sett upp á nokkrum stöðum, á Egilsstöðum og á jafnréttisráðstefnu á Suðurnesjum og á Akureyri.
Veggspjöld eftir Svara Pétur Eysteinsson, grafískan hönnuð og tónlistarmann með meiru, verða til sýnis í Bókabúðinni – vinnurými Skaftfells 18. apríl – 18. maí. Sýningin samanstendur af sex veggspjöldum sem hvert um sig lýsir óþoli listamannsins við ákveðnum hlut og er í leiðinni uppgjör hans við hlutinn. Sýningin opnar laugardaginn 18. apríl klukkan 16:00. Hljómsveitin Létt á bárunni, sem skipuð er hjónunum Svavari Pétri og Berglindi Häsler mun leika við opnunina. Allir velkomnir og frítt inn.